15 aprel 2019 17:17
50

Gənclərin Məşğulluğu Proqramına start verilib

Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti və Gənclər Fondu tərəfindən Gənclərin Məşğulluğu Proqramına start verilib.  

“İki sahil” xəbər verir ki, bununla əlaqədar keçirilən mətbuat konfransında Gənclər Fondunun icraçı direktoru Fərid Cəfərov ölkə gənclərinin hərtərəfli inkişafına şərait yaradılmasının Prezident İlham Əliyevin sosial siyasətinin əsas istiqamətlərindən olduğunu vurğulayıb. F.Cəfərov Fondun bu sahədə gördüyü işlər sırasında gənclərin məşğulluğunun dəstəklənməsinin mühüm yer tutduğunu, hazırda başlanan Gənclərin Məşğulluğu Proqramının qeyd olunan istiqamətdə növbəti addım olduğunu qeyd edib.

Dövlət Məşğulluq Xidmətinin rəisi Fuad Musayev dövlət başçısının uğurlu sosial-iqtisadi siyasətində gənclərin məşğulluğunun təmin edilməsinin mühüm yer tutduğunu bildirib. O, gənclərlə bağlı həyata keçirilən aktiv məşğulluq tədbirlərindən bəhs edib, yeni icrasına başlanan  proqramın gənclərin əmək bazarına inteqrasiyasında önəmli rola malik olacağını diqqətə çatdırıb.

Mətbuat konfransında qeyd olunub ki, Gənclərin Məşğulluğu Proqramının  məqsədi gənclərin uğurlu karyera planlaşdırmasına (ixtisas üzrə iş tapmaq), əlavə iş (xüsusilə də regionlarda) yerlərinin yaradılmasına, iş üçün müraciət edən gəncin ilk iş təcrübəsi qazanmasına, əmək bazarında rəqabətin artırılmasına dəstək verməkdir.

Ali və orta-ixtisas təhsili müəssisələrinin 29 yaşına qədər olan məzunları Proqram çərçivəsində işə cəlb olunacaqlar. Onlarla minimum 1 illik əmək müqaviləsi bağlanacaq və müəyyən müddətə əmək haqqının bir  qismi Fond tərəfindən maliyyələşdiriləcək.  Gənclər üçün Gənclər Fondu və Dövlət Məşğulluq Xidməti tərəfindən təşkil ediləcək karyera planlaması və peşə təlimlərində iştirak etmək imkanı da yaradılıb.

İştirak etmək istəyən gənclər Fondun internet səhifəsində (www.youthfoundation.az) qeydiyyatdan keçib, elektron xidmətlər bölməsindən onlayn qaydada müvafiq vakansiya üzrə müraciətlərini göndərə bilərlər.